A. A. J. van Niekerk skryf om te vermaak en te prikkel. Hy is 'n gebore storieverteller. Onopgesmuk, eerlik, eenvoudig met 'n fyn oog vir sy mense se tekortkominge en hul mooiste oomblikke -stel hy ons in die 31 stuks vertellinge en verhale voor aan 'n wonderlike verskeidenheid égte mense. Mense met raakvat-by-name en rare belewenisse.
Hier is plaasstories, soos van die twee broers wat alles "om-methelfte" gekry het totdat 'n "derde broertjie" dinge kom be-derf. Of die verdomde donkiehings wat oom Stoffel so skade be-rokken het. 'n Windhond wat as riem moes diens doen!
Kleindorpse sketse en verhale, dikwels deur die skrywer se jare lange onderwyservaring ingegee. Hier word nie bloot ro-mantiserend of realisties uitgebeeld nie; ook die roeskant van die blik word soms bekyk. Ons maak kennis met deurbringers, agter-gesteldes, agterstevoor-om mense, windlawaaiers, die minder aansienlikes, die drinkebroers. Ook die eenvoudige siele.
Kroegstories is hier ook, soos die een oor die konfrontasie tus-sen die vuilvegter-Skot en Simon Yster; of oor die onmoontlike Esterhuise'tjies met die afval in die wasskottel.
En hier is anderse jagstories. Klaas Brink wat vir die gereg 'n "slagyster" stel daar teen 'n Kalahari-duin. Die twee onwettige Van Tonder-broers wat Wilhelm Tell speel
Die soort wêreld waaruit skrywers soos Van Niekerk en Jan Spies kom, bied 'n storie- en taalrykdom wat enig in sy soort is. Veral in die Noordwesterse omtes waar stories maak 'n reme-die teen die afgeleënheid self is gaan haal die skrywer sy sto-ries "vir 'n oulap en 'n bokstert". "Optelstories", ja maar 'n onmisbare bydrae tot die Afrikaanse vertelkuns.
George Weideman
Soft cover
BBAF

Condition: Good